SAOTHAR NA SEACHTAINE | 4 Márta 2019

Jonathan Fisher, Map of the Lakes of Killarney, 1789, aquatint on paper, 26 x 36 cm.

CAG.2670 Jonathan Fisher, Map of the Lakes of Killarney, 1789, uiscimir ar pháipéar, 26 x 36 cm.

Is peirspictíocht aerga atá á roinnt linn i SAOTHAR NA SEACHTAINE seo, radharc ón aer ar Chill Airne, Contae Chiarraí!

Tá aird cuairteoirí agus cónaitheoirí araon á tarraingt ar Chill Airne le fada an lá, ó ré na lonnaíochtaí Luath-Chríostaí sa seachtú haois go dtí forbairt na turasóireachta 250 bliain ó shin. Ba sa bhliain 1789 a foilsíodh an léarscáil ghleoite seo le Jonathan Fisher i dteannta lena shraith de 20 radharc de chuid den tírdhreach sléibhtiúil is cáiliúla in Éirinn. Bunaithe ar pheirspictíocht thoir-thiar (seachas thuaidh-theas), forbraíodh an léarscáil seo sular chuir an tSuirbhéireacht Ordanáis tús le léarscáileanna níos mionsonraithe den réigiún a fhorbairt caoga bliain ina dhiaidh sin.

Má chaitear súil níos géire ar an léarscáil, tabharfar faoi deara go bhfuil na príomhshuíomhanna atá léirithe i radhairc an ealaíontóra uimhrithe, ó Uimh.1 (sa lár ag an mbun) atá suite ó dheas de An Fhleisc agus Teach Thiarna Neidín (Teach Chill Airne) go dtí Uimh.20 in aice le Bearna an Choimín agus ó thuaidh de An Leamhain (ar thaobh na láimhe deis ag an mbarr). Chomh maith leis sin, is díol spéise iad na logainmneacha agus an litriú níos sine, lena n-áirítear Turk (Muckross) Lake, Glena (Shehy) Mountain, agus Toomish (Tomies) Mountain.

Ba é Jonathan Fisher (1740-1809) ceann de na healaíontóirí ba thúisce a tharraing aird ar an tírdhreach seo i gContae Chiarraí. Chuir sé tús lena shaol oibre mar éadaitheoir olla i gceantar na Saoirsí i mBaile Átha Cliath, agus ina dhiaidh sin, sna 1760idí, dhírigh sé ar an ealaín. Is ar Shráid na gCaorach, Baile Átha Cliath, a bhí cónaí air lena bhean chéile, Martha Price – iníon ceannaí de bhunadh Chorcaí – agus d'éirigh leis cúpla pingin bhreise a thuilleamh dó féin trí bheith ag obair mar Mhaoirseoir Stampaí idir 1778 go dtí go bhfuair sé bás sa bhliain 1809.

Beidh THAT ABRUPT MAGNIFICENCE: Radhairc Jonathan Fisher de Chill Airne ar taispeáint inár nGailearaithe Nua-Aimseartha (Urlár 2) go dtí an 9 Meitheamh 2019.

As Bearla